2017-06-11 - 僱傭相處之道

2017-06-11 厚待外傭

大記者已經係一個四分三退休人士(還有四分一時間俾人捉去做公關顧問),每每心血來潮,得閒得滯,就走番去沙田故居種花。星期二中午又試捧兩盆花返回舊居,忽然聽到有人拍打大門口鐵閘,出平台一望,係菲律賓人,一老一少年,似係母子,於是大聲用英文詢問:「請問搵邊位。」菲婦答:「Madam,我係Karen呀,真好彩你會喺度。」邊位呀?似乎識得嘅,開閘迎賓,菲婦來一個熊抱:「我係23年前嘅菲傭Karen呀。」於是相認一番,大記者容貌冇乜變,菲傭好容易認得佢,但菲傭Karen就老咗黑咗肥咗好多。
大家坐低飲杯茶,Karen話回菲後嫁咗人,已有四個仔女及一個孫,現在已53歲,今次全家來港旅遊,老公帶仔女上萬佛寺觀光,佢就記得條舊路,叫細仔陪佢上嚟舊居,碰運氣,睇搵唔搵到舊老闆──即係大記者父母。其實大記者全家早已搬離,今次能與Karen重逢,全憑有緣。總之你對人好,人對你好。大記者一家人對菲傭素來照顧周到,節有節賞,年有年賞,菲傭生日有利是,家裏食物若非鮑參翅肚等等,任食唔嬲,常常一齊飲下午茶,現任工人去迪士尼,佢又津貼,收兩百元就同菲傭買一張入場券,難怪菲傭離開23年後還要趁住機會走番嚟碰運氣搵佢一聚。
因是之故,大記者對香港不時發生僱主虐待外傭,或者外傭虐待僱主之嬰兒呢類事情,大感奇怪,覺得不可思議。事實上,一樣米養百樣人,見過一啲鄰居出入豪華房車,到會所吃靚嘢,但竟然嚴限菲傭在家一日三餐公仔麵,有時見到人哋菲傭瘦得沒精打采,其實咁嘅狀態,家務邊會做得好呀,點有心機餵嬰兒食奶呀?曾有一次,左家菲傭偷送月餅往隔壁,俾左丁山撞到,菲傭連忙解釋,左丁山對佢講:「橫掂我哋食唔晒,你送多一兩個月餅俾同胞啦。」鄰居後來知道菲傭食月餅,查明來由,出門見到左丁山就黑口黑面,其實請菲傭印傭,都係想搵人幫忙處理一啲家務繁瑣事啫,冇佢哋,兩公婆點可以日頭返工返得安樂呢,點樣湊仔女呢?對工人唔好,你想工人對你啲仔女好?虐傭乃天下最笨之事,正是搬起石頭砸自己腳,蠢到加零一,有基本常識及公平意識嘅僱主,都唔會咁樣做。外傭每日在家24小時,應視之為家庭成員之一,務要維持良好關係。左丁山自1982年起請菲傭至今,只請了三位,全無煩惱,未必無因嘅。外傭對香港經濟發展好有貢獻,促進香港生產力,虐待外傭是無天理。
 

資料來源:  蘋果動新聞

#萬隆海外僱傭中心 #女傭中心 #女傭中心 #女傭公司 #僱傭 #印傭 #菲傭 #印傭公司 #菲傭公司 #印傭中心 #菲傭中心 #僱傭中心 #僱傭公司 #外傭 #外傭公司 #外傭中心 #EMPLOYMENT AGENCY #DOMESTIC HELPER #MAID AGENCY #最佳僱傭中心 #最佳僱傭服務

Copyright © 2013 Bandung Enterprises.
All Rights Reserved.